ᒪᓃᑦᑐᖅ ᑖᒻᓴᓐ ᐃᓱᓕᑦᑎᔪᖅ ᐱᓕᕆᐊᒥᓂᒃ
ᐃᖅᑲᓇᔭᐃᖅᑎᓄᑦ ᓯᕗᓕᖅᑎᐅᓂᕐᒧᑦ ᐃᓄᐃᑦ ᑕᑯᓐᓇᕋᔅᓴᓕᕆᔨᒃᑯᓐᓄᑦ
ᓴᖅᑭᖅᑕᐅᑦᑕᐅᑎᒋᓂᐊᖅᑐᑦ: ᔫᓂ 24, 2025
ᐋᑐᕚ – ᐃᓄᐃᑦ ᑕᑯᓐᓇᕋᔅᓴᓕᕆᔨᒃᑯᓐᓂ (IBC) ᐊᐅᓚᑦᑎᑦᑎᐊᖅᑐᐊᓘᓚᐅᕐᓂᖓ, ᐃᓕᓴᐃᔨᐅᓯᓐᓈᖃᑦᑕᖅᑐᓂ, ᐱᔨᑦᑎᕋᖅᑐᓂ ᓄᓇᑦᑎᐊᕐᒥ ᒥᓂᔅᑑᓚᐅᓯᓪᓗᓂ ᕼᐊᒻᒪᓚᓄᑦ ᓄᓇᓕᓐᓄᓪᓗ ᓯᕗᓪᓕᖅᐹᖑᓪᓗᓂᓗ ᐊᕐᓇᐅᓪᓗᓂ ᓂᕈᐊᖅᑕᐅᓚᐅᖅᓯᒪᓪᓗᓂ ᒪᓕᒐᓕᐅᕐᕕᒻᒥ ᓄᓇᕗᑦ ᒐᕙᒪᒃᑯᖏᓐᓄᑦ, ᒪᓃᑦᑐᖅ ᑖᒻᓴᓐ ᐃᓱᓕᑦᑎᔪᖅ ᐃᖅᑲᓇᐃᔮᒥᓂᒃ ᐃᖅᑲᓇᐃᔭᖅᑎᓄᑦ ᓯᕗᓕᖅᑎᐅᓂᕐᒧᑦ ᐃᓄᐃᑦ ᑕᑯᓐᓇᕋᔅᓴᓕᕆᔨᒃᑯᓐᓂᑦ (IBC)
ᑖᒻᓴᓐ ᐃᓄᐃᑦ ᑕᑯᓐᓇᕋᔅᓴᓕᕆᔨᒃᑯᓐᓄᑦ (IBC) ᐃᖅᑲᓇᐃᔭᕆᐊᓯᓚᐅᖅᓯᒪᔪᖅ ᐊᕐᕌᒍᐃᑦ ᖁᓕᐅᓕᖅᑐᑦ ᓂᓪᓕᐊᔨᐅᓪᓗᓂ, ᐃᑲᕐᕋᒐᓴᕐᔪᐊᕌᓗᓐᓂ ᑕᐅᓴᖏᓐᓃᑦᑐᓂᒃ ᐱᐅᔪᐊᓗᓐᓂ ᐅᓂᒃᑳᖃᖅᓯᒪᔪᖅ ᐃᓱᒪᒋᔭᒥᓂᒃ ᐅᐊᑦᑎᐊᕈᕐᓂᓴᕐᓂᑦ, ᐃᓄᐃᓪᓗ ᑕᕐᕆᔮᔅᓴᓕᕆᔨᖏᓐᓂ ᑕᕐᕆᔮᑐᖃᕐᓂᓪᓗ ᐊᑐᐃᓐᓇᕈᖅᑎᑕᐅᓯᒪᓪᓗᑎᑦ ᑭᒃᑯᑐᐃᓐᓇᕐᓄᑦ ᑕᑯᓐᓇᕈᒪᔪᓄᑦ. ᐊᕐᕌᒍᓄᑦ ᑕᓪᓕᒪᓄᑦ ᐊᓂᒍᖅᑐᓄᑦ ᐃᓕᓚᐅᖅᓯᒪᔪᖅ ᐃᖅᑲᓇᐃᔭᖅᑎᓄᑦ ᓯᕗᓕᖅᑎᐅᓂᕐᒧᑦ.
ᑖᓐᓴᓐ ᐃᖅᑲᓇᐃᔮᕆᓯᒪᔭᖓ ᐱᐅᓯᕚᓪᓕᑎᑦᑎᑲᓐᓂᕈᒪᓪᓗᓂ ᐃᓄᓐᓂᑦ. ᐃᖅᑲᓇᐃᔮᕐᒥᑎᒍᑦ ᑕᐃᒫᒃ ᐃᓕᓐᓂᐊᑎᑦᑎᓪᓗᓂ, ᐃᓕᓴᐃᔨᓂᒃ ᐱᓕᕆᖃᑎᖃᑐᓂ, ᐃᓕᓴᐃᔨᓂᒃ ᐱᓕᕆᔨᒻᒪᕆᓐᓂᒃ, ᐃᓄᑦᑎᑐᓪᓗ ᐃᓕᓐᓂᐊᑎᑦᑎᓂᕐᒥᑦ ᐊᒻᒪᓗ ᐊᐅᓚᑦᑎᔨᐅᓪᓗᓂ ᑐᓵᔨᐅᔪᓂᒃ ᓯᑖᓐᑕᓐ ᔨᐊᓗᓇᐃ ᐋᓐᓂᐊᕕᖓᓐᓂ. ᖁᕝᕙᕆᐊᖅᑎᑦᑎᑲᓐᓂᕋᓱᐊᖅᑐᓂᓗ ᐃᓄᓐᓂᑦ ᑲᑎᒪᔨᐅᓂᑦᑎᒍᑦ ᓂᕈᐊᖅᑕᐅᓚᐅᖅᓯᒪᔪᖅ ᓄᓇᑦᑎᐊᖅ ᒪᓕᒐᓕᐅᕐᕕᖓᓐᓄᑦ ᐱᔨᑦᑎᕋᖅᑎᐅᓪᓗᓂ ᒥᓂᔅᑕᐅᕚᓪᓗᓚᐅᖅᓯᒪᔪᖅ ᓯᕗᓪᓕᖅᐹᒥ ᐊᕐᓇᐅᓪᓗᓂ ᓄᓇᕗᑦ ᒐᕙᒪᒃᑯᖏᓐᓄᑦ. ᑲᑎᒪᔨᐅᖃᑦᑕᖅᓯᒪᓪᓗᓂ, ᐃᓕᓐᓂᐊᖅᑐᓕᕆᓂᕐᒥ ᐃᖅᑲᓇᐃᔭᖅᑐᓂᑦ ᐃᓕᓐᓂᐊᑐᓕᕆᓂᕐᒥᑦ ᐱᖁᔭᖏᓐᓂ ᓄᓇᕗᒻᒥ ᐃᑲᔪᖃᑦᑕᖅᓯᒪᓪᓗᓂᓗ ᐊᔪᕆᖅᓯᐃᔨᐅᓪᓗᓂ ᐊᒻᒪᓗ ᐃᓱᒪᓕᕆᔨᐅᓪᓗᓂ ᐋᓐᓂᐊᕕᓕᐊᖅᓯᒪᔪᓄᑦ ᓄᓇᕗᒻᒥ ᐋᑐᕚᒧᑦ ᓂᓪᓕᐊᔨᐅᓪᓗᓂ ᐃᓄᐃᑦ ᐃᓐᓇᖁᑎᖏᓐᓂ.
ᒫᓐᓇᕈᓗᒃ, ᐅᓂᒃᑳᖅᑐᐊᖅᑐᖅ ᐃᓄᐃᑦ ᒥᔅᓵᓂ ᐱᕙᓪᓕᐊᔪᒃᑯᑦ ᐱᓕᕆᐊᕆᓂᖅᐹᕆᓚᐅᖅᑕᖓ ᐃᓅᓪᓗᓂ ᐃᖅᑲᓇᐃᔭᖅᑎᓄᑦ ᓯᕗᓕᖅᑎᐅᓪᓗᓂ ᐃᓄᐃᑦ ᑕᑯᓐᓇᕋᔅᓴᓕᕆᔨᒃᑯᖏᓐᓄᑦ (IBC). ᑕᒻᓴᓐ ᓂᓪᓕᔨᐅᓪᓗᓂ ᐃᓱᒪᒋᔭᒥᓂᓪᓗ ᖃᓪᓗᓇᐅᔭᕈᓐᓇᖏᑦᑐᓄᑦ ᐃᓐᓇᕐᓄᑦ ᐃᓚᖃᖅᑐᓂ ᐱᖓᓱᓂᒃ ᓄᑖᕐᓂᑦ ᑕᓚᕖᓴᒃᑯᑦ ᑕᑯᔅᓴᐅᑎᑦᑎᕙᓚᐅᖅᑐᑦ ᖁᕕᐊᓲᑎᖃᖅᑐᓂᓗ ᐃᓄᐃᑦ ᐱᖅᑯᓯᖏᓐᓂ ᐅᖃᐅᓯᖏᓐᓂᓪᓗ.
‘ᐃᒃᐸᒃᓴᖅ’ ᑕᑯᔅᓴᐅᑎᑦᑎᔪᑦ ᐃᓐᓇᕐᓂᑦ ᐊᔾᔨᓐᖑᐊᑐᖃᖏᓐᓂ ᐃᓚᒌᓐᓂᒃ ᐅᐊᑦᑎᐊᕈᕐᓂᓴᕐᓂᑦ, ‘ᑏᑐᖅᑕ’ ᐃᓅᓯᕐᒥᓅᖓᔪᑦ ᐃᓄᐃᑦ ᐃᓅᓱᑦᑐᓄᑦ ᐊᒻᒪᓗ ᐱᔭᕆᐊᑐᔪᓂᒃ ᐊᑦᑐᐊᓂᖃᕐᓂᖏᓐᓂ ᐱᖅᑯᓯᕐᒥᑦ ᐅᖃᐅᓯᓕᕆᓂᕐᒥᓪᓗ ᐊᒻᒪᓗ ‘ᒪᖃᐃᑦᑐᑦ’ (ᓄᑖᖅ ᐊᓯᕙᕐᓂᒥᑦ ᐅᖃᐅᓯᓕᒃ) ᐃᓱᒪᒋᔭᐅᓐᖑᐊᖅᑐᑦ ᓴᖅᑭᔮᖅᑎᑕᐅᔪᑦ ᐃᓄᐃᑦ ᐃᓱᒪᒋᔭᖏᓐᓂ. ᑕᓚᕖᓴᖅᑎᒎᑦᑐᑦ ᐊᔾᔨᐅᖏᑦᑐᑦ. ᓄᑖᓂᓪᓗ ᐃᓕᓐᓂᐊᕈᑎᔅᓴᓂᑦ ᓴᖅᑮᕙᑦᑐᓂ, ᑖᒻᓴᓐ ᓴᖅᑮᓚᐅᖅᓯᒪᒻᒥᔪᖅ “ᖃᓄᖅ ᐃᓱᒪᕕᑦ” ᐃᓄᓐᓄᑦ ᕿᒥᕐᕈᔭᐅᒐᔪᑦᑐᓂᒃ ᑲᑎᒪᔩᓪᓗ ᒥᔅᓵᓄᑦ ᐅᖃᐅᓯᖃᖅᐸᑦᑐᑎᑦ ᓂᓪᓕᐊᔨᐅᓪᓗᓂᓗ, ᖃᖓᑐᓐᓇᐃᓐᓇᖅ ᐊᑦᑐᐃᓂᖃᖅᑐᓂᓪᓗ ᓄᓇᕗᒻᒥ, ᐃᓄᑦᑎᑐᐃᓐᓇᑦᑎᐊᖅ ᓴᖅᑭᔮᖅᑐᑎᑦ.
ᑖᒻᓴᓐ ᐱᓕᕆᔪᕐᔪᐊᖑᓚᐅᖅᑐᖅ ᐃᖅᑲᓇᐃᔮᕐᒥᓂᒃ ᓂᓪᓕᐊᔨᐅᓪᓗᓂ ᐃᓄᐃᑦ ᐱᔪᓐᓇᐅᑎᖏᓐᓂ, ᐱᖅᑯᓯᖏᓐᓂ ᐅᖃᐅᓯᖏᓐᓂᓪᓗ ᐱᓗᐊᖅᑐᒥᑦ ᐅᐊᑦᑎᐊᕈᕐᓂᓴᐅᔪᓂᓪᓗ ᐊᑐᖅᓯᒪᔭᖏᓐᓂ ᑎᒍᒥᐊᕐᓂᒥᓪᓗ ᐅᐱᒋᔭᖃᕐᓂᒥᓪᓗ ᑭᖑᕚᖏᓐᓂ ᐃᓄᐃᑦ ᓯᕗᓕᖅᑎᓂᒃ ᓴᓇᔨᓂᓪᓗ ᐊᒻᒪᓗ ᐅᖓᑖᓄᒃᑲᓂᕐᒪᕆᒃ.
ᑲᑎᒪᔨᓐᓃᓐᖔᕐᓗᑕ, ᐃᖅᑲᓇᐃᔭᖅᑎᓂᓪᓗ ᑕᐃᒃᑯᐊᓗ ᐊᑦᑐᖅᑕᐅᓯᒪᔪᑦ ᐱᓕᕆᑦᑎᐊᖏᓐᓇᖅᑐᓄᑦ ᓂᓪᓕᐊᔨᐅᕙᑦᑐᓂᒃ ᐃᓄᐃᑦ ᐱᔪᓐᓇᐅᑎᖏᓐᓂ ᐱᖅᑯᓯᖏᓐᓂᓪᓗ, ᖁᔭᓐᓇᒦᖅᑕᕗᑦ ᖁᕕᐊᓱᖁᒥᓈᓂᑦ ᖃᓄᐃᓘᕐᓂᐊᕋᓗᐊᕈᕕᑦ.
ᑐᑭᒋᐊᒃᑲᓐᓂᕈᒪᓐᓂᕈᕕᑦ, ᖃᐅᔨᒋᐊᕈᓐᓇᖅᑐᑎᑦ ᑭᐅᕋ ᐳᕋᓐᑕᔅᒧᑦ, ᐃᓄᐃᑦ ᑕᑯᓐᓇᕋᔅᓴᓕᕆᔩᑦ (IBC) ᐊᐅᓚᑦᑎᔨᖓ ᑐᓴᐅᒪᖃᑦᑕᐅᑎᓕᕆᔨᒃᑯᓐᓄᑦ ᐃᓗᓕᖏᓄᓪᓗ, ᐅᕗᖓ (613) 235-1892 or karen@inuitbroadcasting.ca.
Inuktitut IBC Press Release Manitok Thompson Retirement Final
