ᑕᕐᕆᔭᒐᒃᓴᓕᐅᕐᓂᖅ

AJUNGI ᐊᔪᙱ ᓴᖅᑭᔮᖅᑎᑦᑎᕗᖅ ᐊᔾᔨᖃᖏᑦᑐᓂᒃ ᐃᓕᓴᐃᔾᔪᓯᕐᓂᒃ ᐃᓄᐃᑦ ᐃᓕᖅᑯᓯᑐᖃᖏᓐᓂ, ᐊᔪᙱᑕᐅᔪᑦ ᖃᐅᔨᒪᔭᐅᔪᓪᓗ ᐃᓕᑕᐅᕙᓪᓕᐊᓪᓗᑎᒃ ᐃᓚᒌᑎᒍᑦ, ᐊᖓᔪᖅᑳᒥᑎᑐᑦ ᕿᑐᕐᖓᒧᑦ ᐃᑦᑐᕐᒥᑦ ᐃᕐᖑᑕᒧᓪᓗ. ᑕᑯᒃᓴᐅᓪᓗᑎᒃ ᑲᔾᔮᕐᓇᓪᓚᒃᑐᓂ ᓄᓇᑐᖃᓂ ᐃᒪᕐᓂᓗ, ᑕᕐᕆᔭᓕᐅᓲᑦ ᐃᓕᑉᐸᓪᓕᐊᔾᔪᓯᕐᓂᒃ ᑕᐅᑐᖕᓂᒃᑯᑦ, ᐊᔪᕆᓐᓂᒃᑯᓪᓗ, ᑕᑯᒃᑕᐅᑎᑦᑎᓪᓗᑎᒃ ᐱᓕᕆᔪᓂᒃ ᕿᒧᒃᓯᖅᑐᑎᑐᑦ, ᖁᓪᓕᕐᒥᒃ ᐃᑭᑦᑎᔪᑦ, ᓇᑦᑎᐅᓪᓗ ᕿᓯᐊᓂᒃ ᑲᒥᓕᐅᖅᑐᑦ ᒥᖅᓱᑦᑎᐊᖅᓯᒪᓪᓚᒃᖢᑎᒃ.

ᑕᑯᒋᓇᐃ ᐊᓕᐊᓇᐃᒋᔭᐅᓪᓚᒃᑐᑦ ᓱᕈᓯᓄᑦ ᑕᕐᕆᔭᒐᑦ ᐃᓚᐅᓪᓗᓂ “ᔭᓂ” ᐊᕕᙵᖅ ᓄᓇᓕᖕᓂᓗ ᓴᓇᔭᐅᔪᑦ ᐆᒪᔪᙳᐊᑦ ᐃᓕᓴᐃᓯᒪᔪᑦ ᐃᓄᑦᑎᑐᑦ, ᐃᓅᓯᕐᒥ ᐊᔪᖏᓐᓂᕐᓂᒃ ᐃᓕᖅᑯᓯᑐᖃᒃᑯᓪᓗ ᐅᒃᐱᕆᔭᐅᔪᓂᒃ ᐃᒃᐱᒍᓱᖕᓂᖅᑎᑐᑦ, ᐊᓯᓄᑦ ᑐᓂᓯᓂᕐᓂᒃ, ᕿᓄᐃᓵᕐᓂᕐᓂᒡᓗ ᐃᓄᖕᓄᑦ ᓱᕈᓯᓄᑦ− ᑕᐅᑐᒃᑐᓄᓪᓗ ᖃᔅᓯᑐᐃᓐᓇᓂᒃ ᐊᕐᕌᒍᓕᖕᓄᑦ− 1987ᒥᓂᑦ

ᐃᒃᐸᒃᓴᖅ
ᐃᒃᐸᒃᓴᖅ ᐃᒃᐱᒍᓱᖕᓇᖅᑑᓪᓗᓂ ᑭᖑᓕᕇᖑᔪᑦ ᑕᓚᕖᓴᒐᒃᓴᑦ ᐃᓄᐃᑦ ᐃᓐᓇᖏᑦ ᐅᓂᒃᑳᖅᖢᑎᒃ ᐃᓚᒥᓂᑦ ᐅᓂᒃᑳᓂᒃ, ᐃᓕᖅᑯᓯᑐᖃᒃᑯᑦ ᐊᑐᓚᐅᖅᑐᓂᒃ, ᐃᓱᒪᒋᔭᕐᒥᓂᒡᓗ ᐊᓯᔾᔩᔪᓂᒃ ᐊᓯᔾᔨᕐᓂᕐᓂᒃ ᐃᓄᐃᑦ ᐃᓅᓯᖏᓐᓂ, ᐊᑐᖅᖢᑎᒃ ᐊᔾᔨᑐᖃᓂᒃ ᐱᒋᐊᕈᑎᒋᓪᓗᒍ ᐳᐃᒍᔾᔭᐃᕈᑎᒋᓗᒍ ᕿᒪᒃᑕᒥᓂᒃ ᑲᑎᑎᒃᑲᓐᓂᕐᓗᓂᓗ ᑭᖑᕚᕇᓂᒃ.

ᒪᖃᐃᑦᑐᑦ ᒪᖃᐃᑦᑐᑦ ᑕᐃᒪᐃᑦᑕᕆᐅᖅᑑᓪᓗᓂ ᓄᑖᖑᔪᖅ ᑭᖑᓕᕇᑦ ᑕᓚᕖᓴᒐᒃᓴᑦ ᐃᓄᐃᑦ ᑕᑯᓐᓇᕋᑦᓴᓕᕆᔩᑦ ᑯᐊᐳᕇᓴᖓᓂᑦ ᑲᑎᑎᑦᑎᔪᑦ ᖃᐅᔨᒪᔭᑐᖃᓂᒃ ᐅᓪᓗᒥᐅᑉ ᓴᓇᐅᒐᖏᓐᓄᑦ ᓴᖅᑭᔮᖅᑎᖦᖢᒋᑦ ᑲᔾᔮᕐᓇᕐᓂᖏᑦ ᐅᑭᐅᖅᑕᖅᑑᑉ ᓄᓇᖏᓐᓂ, ᐆᒪᔪᑦ ᑕᒫᓂᕐᒥᐅᑕᑦ, ᐃᓕᖅᑯᓯᑐᖃᓪᓚᕆᔭᐅᓚᐅᖅᑐᓪᓗ ᐊᖑᓇᓱᖕᓂᕐᓄᑦ, ᐅᑭᒃᑳᕆᐅᔭᓪᓗᑎᒃ ᐊᓂᕐᓃᕈᑎᓇᖅᑐᓄᑦ ᐊᔾᔨᓕᐅᖅᓯᒪᔪᓄᑦ ᐃᓄᐃᑦ ᐃᓐᓇᖏᑕ ᓯᓚᑐᓂᖏᑎᒍᓪᓗ.

ᖃᓄᖅ ᐃᓱᒪᕕᑦ ᑕᕝᕙᙵᑲᐅᑎᒋ ᑕᓚᕘᕐᕕᒋᓇᖅᑐᖅ ᑲᑎᑎᑦᑎᔪᖅ ᐃᓄᐃᑦ ᓄᓇᓕᖏᓐᓂᒃ ᐅᑭᐅᖅᑕᖅᑑᑉ ᐃᓗᐊᓂ ᐊᑑᑎᓕᖕᓄᑦ ᐅᖃᖃᑎᒌᖕᓂᒃᑯᑦ ᖃᐅᔨᒪᔭᑐᖃᓄᑦ, ᐅᓪᓗᒥ ᐊᒃᓱᕈᕐᓇᖅᑐᓄᑦ, ᐃᓕᖅᑯᓯᑐᖃᒃᑯᓪᓗ ᑭᓇᐅᓂᕐᓄᑦ, ᐃᓚᐅᓪᓗᑎᒃ ᑐᓴᕐᓂᖅᑐᑦ ᖃᐃᖁᔭᐅᓯᒪᔪᑦ, ᐅᓂᒃᑳᑦ ᐃᒃᐱᖕᓇᖅᑐᑦ, ᐃᓱᒪᓇᖅᑐᓪᓗ ᐅᖃᐅᓯᕆᔭᐅᔪᑦ.

ᑏᑐᕐᑕ ᓄᑖᖑᔪᖅ ᒪᒃᑯᒃᑐᓅᖓᔪᖅ ᑕᓚᕖᓴᒐᒃᓴᖅ ᐅᖃᐅᓯᒃᓴᒥᒃ ᓂᕈᐊᖅᖢᑎᒃ ᑐᓴᕈᒪᕙᒃᖢᑎᒃ ᐃᓱᒪᒋᔭᐅᔪᓂᒃ ᒪᒃᑯᒃᑐᓂᑦ ᐃᓄᐃᑦ ᓄᓇᖓᓐᓂᑦ. ᑲᑎᑎᑦᑎᓲᖅ ᐃᓄᐃᑦ ᓄᓇᓕᖏᓐᓂᒃ ᓄᓇᕐᔪᐊᑉ ᐃᓗᐊᓂ, ᑲᑎᑎᑦᑎᓪᓗᓂ ᑕᑯᒃᓴᐅᑲᐅᑎᒋᔪᓂᒃ, ᐃᓕᖅᑯᓯᑐᖃᓂᒃ ᖃᐅᔨᓇᓱᒃᑐᓂᒃ, ᐅᓂᒃᑳᖅᑐᐊᕈᓘᔭᖅᑐᓂᒡᓗ ᐅᐱᓐᓇᕈᑎᒋᓪᓗᒋᑦ, ᓴᖅᑭᔮᖅᑎᑦᑎᓪᓗᑎᒃ ᐊᔪᙱᑕᐅᔪᓂᒃ, ᐱᕈᖅᓴᐃᓪᓗᑎᒡᓗ ᐊᑑᑎᖃᑦᑎᐊᖅᑐᓂᒃ ᑲᑎᓐᓂᕐᓂᒃ ᐃᓄᐃᑦ ᒪᒃᑯᒃᑐᖏᓐᓂ.